Претседателот на ВМРО-ДПМНЕ, Никола Груевски во Виена, Австрија оствари средба со шефот на парламентарната група на владеачката партија и поранешен секретар во министерство за надворешни работи на Австрија, Рајхолд Лопатка, соопштија од ВМРО-ДПМНЕ.
„На средбата Груевски го запозна соговорникот со актуелната политичка состојба, со позициите и ставовите на ВМРО-ДПМНЕ во поглед на нејзиното надминување.
Груевски посочи дека најбрз и најефикасен начин за излез од кризата е спроведување на предвремени парламентарни избори заедно со редовните локални избори каде што народот ќе одлучи за иднината на државата.
На средбата Груевски истакна дека промовирањето на документи и платформи креирани во соседни држави за кој народот не одлучил на избори и кои потоа се нудат за основа за понатамошна владина работа претставува изборна измама со која ВМРО-ДПМНЕ и граѓаните не се согласуваат.
На средбата Груевски истакна дека ВМРО-ДПМНЕ и коалицијата „За подобра Македонија“ во парламентот ги користат сите деловнички законски можности за искажување на своите позиции и ставови низ законска парламентарна дебата. Она што таму се случува не претставува исклучок од она што се случувало во минатото, но и од она што се случува и случувало во други демократски земји во Европа и светот, додаде Груевски.
Груевски истакна дека ќе продолжи да се залага и работи за економски напредок на државата, и остварување на стратешките интереси врзани со интеграција во ЕУ и НАТО“ стои во соопштението на ВМРО-ДПМНЕ.