Името е на државата, на народот. Само народот може да одлучува за името и тоа на јавно распишан, организиран референдум. Само народот може да одлучи дали, кога и како би се менувало или не, името на државата, истакна денеска претседателот на ВМРО-ДПМНЕ и премиер Никола Груевски на промоцијата на партискиот кандидат за градоначалинк на Скопје Коце Трајановски.
– Во последно време гледам го враќаат во игра името. Ја вадат темата повторно. Откако со насилство и со бојкот им завршија голема работа на оние кои ја попречуваат Македонија во европските интеграции, и тоа не им е доволно. Сега пак почнаа да шпекулираат со името. Сакам да му кажам на Бранко. Еднаш, двапати, безброј пати сум кажал, а тоа го има и во нашата програма, дека името е на државата, на народот. Само народот може само да одлучува за името, рече Груевски.
Црвенковски од него, како што напомена, не може да очекува исто да постапи.
– Како пред 20 години, кога во договор во четири очи, тајно и конспиративно го промени името и потоа викаше дека тоа ќе било за само два месеца, а потоа дека се ќе се врати по старо. Не се чепкај Бранко за името. Народот памети и одлучува. Запамети го тоа, порача Груевски.