Претседателот на Владата Никола Груевски денеска изјави дека не смета дека е потребно одржување лидерска средба за деблокирање на носењето на буџетот во Собранието, бидејќи причина за блокадата е суетата на лидерот на опозициската СДСМ.
– Не се работи за лидерска средба, се работи за суетата на еден човек, тоа е Бранко Црвенковски и за неговиот политички опстанок, изјави премиерот Груевски.
Ние, додаде тој, дадовме четири предлози за компромис за буџетот и сите ги одбија.
– Што да се собереме на лидерска средба да си ги грабаме микрофоните пред нас, нема логика. Станува збор за суетата на еден човек, за неговата политичка кариера. Во залог става два милиона луѓе. Би свикал таква средба да има таква логика, да знам дека нешто сериозно се размислува во тој табор или дека се прават некои сериозни калкулации. Таму има една размисла како да опстане еден човек во политиката. Што да разговарам со него на таа политичка средба. Поминале 21 година откако е во политиката, направил што направил, луѓето го ценат или не го ценат тоа што го направил, рече премиерот.
Премиерот Груевски одговарајќи на новинарско прашање за предлогот на Руфи Османи од НДП за формирање широка влада, изјави дека гостиварскиот градоначалник треба да освои повеќе од два проценти на изборите за да дава такви предлози.