Говорот на претседателот Ѓорге Иванов е оксиморон. Ако го ставиме на полиграф ќе изгледа шашаво за да се дефинира што е суштината и што се пораките. Имаме над 26 забелешки. Но главно е во делот за Законот за јазици. Ваква е реакцијата на Координаторот на пратеничката група на ДУИ, Артан Груби, по говорот на Иванов – кој Законот за јазици го оцени како неуставен и репресивен.
„Со овој закон се заокружува Рамковниот договор потпишан од сите партии и претседателот Борис Трајковски. Овој закон извира од Уставот и е во целосна согласност со него. Иванов треба да биде пример за кохезија на меѓуетничките и добрососедските односи“, рече Груби
Додаде дека е скандалозна изјавата на Иванов за соседите и рече дека тој треба да се извини за коментарите кон Косово и Приштина.
Иванов во своето обраќање посочи на финансиската помош од Косово за актерите ангажирани во терористичките акти во Гошинце и Диво Насеље, прашувајќи дали на тој начин Приштина и заблагодарила на Македонија за згрижувањето на 350.000 косовски бегалци во 1999 година и признавањето на косовската независност.
Г.Н.Р.