Предлог Меморандум за разбирање меѓу Македонија и Грција преку писмо до шефот на македонската дипломатија Никола Попоски понуди неговиот грчки колега Димитрис Аврамопулос.
Во предлог-меморандумот се содржани генералните принципи за кои Македонија и Грција треба да се согласат во меѓусебните односи, меѓу кои се потврдување на заедничките граници, меѓусебно почитување на интегритетот и независноста на двете земји и потврда дека Скопје и Атина меѓусебно немаат територијални претензии.
Меѓу другото, Атина предлага Грција и Македонија да се согласат дека конечното решение на спорот со името ќе содржи одредница што јасно ќе ја одвои територијата на Република Македонија од регионот Македонија, особено делот од тој регион во северна Грција.
„Се согласивме дека со цел да се овозможи свеж поттик во содржината на преговорите под покровителство на Генералниот секретар на Обединетите нации, важно е да се продолжи врз основа на согласената рамка на основните параметри на решение што ќе вклучи договор врз основа на фактот дека кој и да е предлог треба да содржи јасна и конечна одредница во однос на името, што нема да остави двосмислености во однос на разликувањето на територијата на поранешната југословенска Република Македонија и регионите на соседните земји, особено во однос на регионот Македонија во северна Грција, и името за кое ќе се согласиме ќе биде употребувано од сите – ерга омнес и за сите цели”, стои во текстот на предлог-меморандумот.
Во пропратно писмо на Аврамопулос адресирано до Попоски, шефот на грчката дипломатија ја истакнува потребата од конечно затворање на прашањето за името.
„Земајќи ја предвид потребата од натамошно подобрување на односите меѓу двете земји на сите ниво, предлог Меморандумот за разбирање вклучува генерални принципи на водење на добрососедски односи, почитување што е важно во нашите напори да обезбедиме мир, просперитет и заемно разбирање во нашиот регион”, вели Аврамопулос во писмото до Попоски.
„Уверен сум дека ќе се согласиме со мене, драг колега, дека имаме обврска да пристапиме кон прашањето за името во добра волја и на конструктивен начин. Постигнувањето на заедничко решение во долгогодишниот спор неповратно ќе води кон целосна нормализација на нашите односи и кон исполнување на аспирациите на нашите два народи”, му пиша Аврамопулос на Попоски.
Понудувањето на Меморандум за разбирање од Атина до Скопје следува на само една недела по средбата на Аврамопулос и Попоски во Њујорк.