Обединетите нации бараат забрзување на преговорите за решавање на прашањето за името, јавуваат денеска сите грчки медиуми.
Сите медиуми известуваат за вчерашата средба на на министерот за надворешни работи Димитрис Аврамопулос и генералниот секретар на ОН Бан Ки Мун, од која како главен акцент се извлекува изјавата на Аврамопулос дека „Грција презеде значајни иницијативи во контекст на напорите за решавање на прашањето за името, како што е предлогот за потпишување на меморандум за разбирање со Скопје“.
Според грчки дипломатски извори, Аврамопулос на средбата „ја потврдил посветеноста на Атина за продолжување на преговарачкиот процес во рамките на Обединетите Нации“.
Медиумите го пренесуваат и соопштението од ОН во кое се истакнува дека генералниот секретар на ОН Бан Ки Мун сака забрзување на преговорите за „името“ на Македонија, како и за кипарското прашање.
Сепак, главна вест од вчерашната средба во Њујорк е вербалната нота која Атина вчера ја достави до Обединетите Нации за турскитеистражувања во Егејското море.
Грчкото МНР соопшти дека поднесувањето на нотата е заштитна мерка на Грција во одбрана на суверените права во земјата, во согласност со Законот за морето, а особено со Конвенцијата на ОН за Законот за морето од 1982 година.