Мрежата за заштита од дискриминација, Платформата за родова еднаквост, Македонската платформа против сиромаштија и Националната мрежа против насилство врз жени и семејно насилство упатија апел до пратениците да не ги поддржат предложените измени на Законот за игри на среќа и забавни игри.
Според нив, со измените од законското решение се бришат граѓанските организации, националните инвалидски организации и Црвениот крст како организации што можат да добиваат средства за работа со ранливи категории граѓани.
„Ова не е само техничка измена, туку сериозен преседан кој може да има долгорочни последици врз граѓанското општество, заштитата на ранливите категории и демократијата во Северна Македонија“, се наведува во реакцијата.
Организациите потсетуваат дека со децении обезбедуваат директна поддршка за лица со попреченост, жртви на семејно и родово базирано насилство, стари и изнемоштени лица, деца, млади, жени, Роми и други ранливи категории, преку советувалишта, дневни центри, шелтер-центри и други услуги.
Тие предупредуваат дека предложените измени отвораат ризик средствата наменети за ранливи категории да се распределуваат без јасни, транспарентни и отчетни критериуми, како и без гаранција дека ќе стигнат до организации со искуство и експертиза.
„Доколку постојат слабости во досегашниот систем, решението не е бришење на граѓанските организации од законот, туку воспоставување потранспарентен и поотчетен систем со јавни повици, јасни критериуми, независна евалуација и редовен мониторинг“, велат организациите.
Тие бараат од пратениците јавно образложение од предлагачите на законот за причините поради кои граѓанските организации, националните инвалидски организации и Црвениот крст се бришат од законското решение.
Во апелот се оценува дека исклучувањето на граѓанскиот сектор од законите е „опасен сигнал“ и отвора прашања за стеснување на просторот за граѓанско дејствување и оддалечување од демократските стандарди и европскиот пат.
Организациите ги повикуваат пратениците да не ги поддржат измените во сегашната форма, да побараат нивно повлекување или измена, како и да организираат јавна расправа и консултации со релевантните чинители.
Дополнително, тие бараат воспоставување транспарентен и отчетен механизам за распределба на средствата, заснован на јавни повици, јасни критериуми и реалните потреби на граѓаните.