До крајот на идниот месец гостиварското село Беловиште ќе добие канализација. Оваа вест на локалното население им ја соопштија раководните луѓе на општина Гостивар.
Гостиварскиот градоначалник Арбен Таравари при посетата на Беловиште, придружуван од Исак Љазими, директор на ЈП „Комуналец“, на беловиштани им презентираа детали од овој проект.
– Реализацијата на овој проект ќе почнеше порано, но претходно требаше да помине кај управните органи на претпријатието. Се надеваме дека и формалностите за добивање на одобрението ќе бидат наскоро со што и работите ќе започнат, истакна првиот човек на ЈП Комуналец, Љазами.
Канализацијата во Беловиште и дел од Лопушник со должина од околу два километра беа дел од предизборната програма на актуелното општинско раководство.
– Со директорот на ЈП „Комуналец” се координиравме деновиве за да почнат градежните работи. Веруваме дека во предвидениот рок овој проект ќе биде реазлиран. Со ова ќе се реши еден од најкрупните проблеми во ова село и остварено ветување за време на изборната кампања на локалните избори, подвлече градоначалникот Таравари.