Јасно е дека има аналогии меѓу состојбата со ЕУ и НАТО, но останува фактот дека за членство во НАТО е потребна едногласна согласност на сите земји-членки, изјави американскиот помошник државен секретар за европски прашања Филип Гордон, на прашањето дали може најавите за преговори со ЕУ и без да се реши спорот да се пресликаат и во интеграциите во НАТО.
– Има одредени аналогии меѓу ЕУ и НАТО. Можам да кажам дека во НАТО жалиме што Македонија се уште не е членка, таа ги исполни условите и нејзиното членство ќе биде фактор за стабилност.Членството во НАТО има поддршка од сите енички групи. Но, не можеме да го смениме фактот дека НАТО работи со консензус и проширување мора да има само ако сите членки се согласни. Ние продолжуваме да велиме дека членство на Македонија во НАТО ќе биде позитивно и ќе правиме се што можеме да дојде до взаемно прифатливо решение за спорот, изјави Гордон.
Американскиот помошник државен секретар за европски прашања ја повтори можноста следниот самит на НАТО да биде самит на проширување, со прием на нови членки, од Македонија, Црна Гора, Босна и Херцеговина и Грузија, како што најави државниот секретар Хилари Клинтон на самитот на НАТО во Чикаго. Сепак, Гордон потсети дека за тоа мора да се исполнат условите.
– Самитот се уште не е закажан, но секако, ако членките се подготвени за проширување и земјите кандидатки се подготвени. Земјите кои се подготвени за членство не би требало да чекаат. Сите критериуми мора да се исполнат, а еден од тие услови е консензусот на членките. Вратата е отворена, а земјите знаат што треба да сторат, изјави Гордон.
Помошникот државен секретар Гордон го повтори американскиот став и за пресудата на Меѓународниот суд на правдата од Хаг.
– Ја нотиравме пресудата на Меѓународниот суд на правдата, добро сме запознати со неа. Суштината на пресудата е дека ставот на Грција е спротивен на Времената спогодба. Но, и во тој случај НАТО може да се прошири само кога има консензус на членките. Затоа апсолутно е потребно да има договор на двете страни, изјави Гордон.