Вчера кандидатот за градоначалник на Македонски Брод, Марјан Ѓурчески заедно со лидерот на Левица, Димитар Апасиев, носителот на советничката листа, Жарко Тодороски и дел од кандидатите за советници од Левица имаа средби со жителите на градот. Настанот помина во позитивна атмосфера, со директна презентација на програмата и идеите на партијата за развој на општината. Програмските определби на Левица се насочени кон зголемување на можностите за вработување на младата популација и зајакнување на капацитетите на противпожарната територијална единица. Предвиден е и нов Детален урбанистички план за центарот на Македонски Брод, велат од Левица.
„Дополнително, акцент се става на поттикнување на културни настани и поддршка на талентирани ученици. Во програмата е вклучено и совесно управување со отпадот, како и зачувување на квалитетот на воздухот и водите на реката Треска.
Мојата визија е во Македонски Брод да се создадат нови можности за вработување на младото и квалификувано население, градот да добие нов урбанистички лик и да се унапреди квалитетот на образованието. Целта ми е Македонски Брод да го сочува својот автентичен природен изглед, да стане пример за естетика на јавниот простор и да обезбеди прогрес на локалниот економски развој. Поддршката на политиките на Левица мора да биде препознаена – народот сега треба да го заокружи бројот 6 за да ја добиеме иднината која ни припаѓа“, изјави кандидатот за градоначалник, Ѓурчески.