Кандидатот за градоначалник на Куманово од коалицијата „За подобра Македонија“ Зоран Ѓорѓиевски денеска на прес-конференција ја претстави изборната програма.
– Имаме програма со која ќе настапиме на овие локални избори како и досега. Разликата од сите наши конкуренти е што ние работиме посветено, ќе дадеме се од себе и своите зборови ќе ги претвориме во дела, рече Ѓорѓиевски.
Додаде дека во програмата со која настапуваат на изборите се опфатени главните определби по кои ќе работат, а меѓу нив ги посочи проектот за зелено Куманово и за локален економски развој. Ѓорѓиевски рече дека се планирани и проекти од инфраструктурата, културата, образованието, младите и спортот.
– Во нашата програма за која ветуваме комплетна реализација во периодот од четири години ќе понудиме нова ера за Куманово, ново време за кумановци, рече Ѓорѓиевски на прес-конференција.
