На Клиниката за гинекологија и акушерство синоќа почина пациентка на возраст од 38 години со шеста високоризична бременост која била примена вчера со констатиран мртов плод во 24 гестациска недела (6-ти месец) со прснат воденик при што истекуваше гнојава содржина од утерус и истата имаше непријатен мирис, како и сите тешки знаци на инфекција.
Од Клиниката соопштија дека со пациентката било постапено по сите протоколи во вакви тешки случаи, со максимален залог на дежурната екипа на гинеколози и анестезиолози од таа јавна здравствена установа и анестезиолози од Карил, како и на раководниот тим на Клиниката. Семејството на пациентката, посочуваат од Клиниката, беше во целост навремено информирано за состојбата на пациентката.
И покрај сите заложби на персоналот за жал дојде до смртен исход. Членовите на Комисијата за следење и унапредување на квалитетот за здравствената заштита итно се состана за овој случај со цел да се направи увид во овој случај по што е констатирано дека се испочитувани сите процедури, стои во соопштението од Клиниката.
Од Клиниката апелираат средствата за јавно информирање и пошироката јавност до добивањето на обдукцискиот наод од релевентните институции како доказ за дефинитивна причина поради која настапила смртта, да не објавуваат шпекулации во врска со случајот кои дополнитено би ја вознемириле јавноста и семејството.