„ВМРО – ДПМНЕ и ДУИ продолжуваат со меѓусебните натегања и препирки, кои овојпат се преселија во училиштата во скопски Аеродром, но и во Чаир и Сарај. Откако градоначалникот на Аеродром Коневски ги примора учениците Албанци од повеќе паралелки да учат во една училница, сега истото, како одговор го најавуваат и градоначалниците на Чаир и Сарај“. Ова го изјави потпретседателот на СДСМ Гордан Георгиев според кого ова е срамна игра на двете партии, во која нивниот реваншизам и политичките препукувања паѓаат врз грбот на граѓаните.
„ВМРО – ДПМНЕ и ДУИ бескрупулозно ги вовлекуваат децата во нивните валкани игри и наместо да ги решаваат проблемите, постојано ги продлабочуваат, обидувајќи се да и вратат на другата страна.
Иако седат заедно во власта, ВМРО – ДПМНЕ и ДУИ на терен ги разгоруваат меѓуетничките тензии. Тие се натпреваруваат во тоа кој да направи поголема пакост, сега веќе ставајќи ги децата во центарот на нивните расправии. Ваквите провокации и реваншистички потези не се нови, но се многу опасни, затоа што директно ги загрозуваат меѓуетничките односи и стабилноста на државата“, рече Георгиев.
Тој кажа дека ВМРО – ДПМНЕ и ДУИ го прават ова затоа што немаат решение за катастрофалната состојба во која самите ја доведоа државата.
„Тие немаат одговор на прашањата за растечката сиромаштија и невработеност, постојаните поскапувања на основните продукти, растурената економија, колабираното здравство, рецесијата“, рече Георгиев.
