За месец до месец и пол тлото во регионот околу Маврово ќе се смири и повторувачките земјотреси ќе престанат, вели за „А1он“ професорот Михаил Гаревски, директор на Институтот за земјотресно инженерство и климатски промени (ИЗИКП). Сегашната серија земјотреси Гаревски вели дека е последица на земјотресот од пет степени според Рихтеровата скала од ноември минатата година.
„Јас сметам дека главниот потрес беше пред пет месеци, а сите што следуваа се негови афтершокови. Такви потреси многу веројатно ќе има уште месец до месец и пол, кога тлото целосно ќе се смири“, рече директорот Гаревски за „А1он“.
Од петокот вечерта до денес, според Европскиот медитерански сеизмолошки центар, во регионот околу Маврово имало единаесет земјотреси. Од нив најсилен бил оној од петокот вечерта со магнитуда од 4,7 степени според Рихтер, а најслабиот со 2,2 степена бил вчера во 15:15 часот. Граѓаните кои ги почувствуваа земјотресите опишуваа дека се слушала силна бучава и вертикално тресење.
„Тие што слушаат силна бучава и чувствуваат вертикално тресење значи дека се блиску до епицентарот. Колку се поблиску толку е посилна бучавата. Подалеку од епицентарот не се слуша бучавата, потресот е хоризонтален и ризикот од штети е помал“, објаснува директорот Гаревски.
Тој уверува дека активноста на дебарскиот расед, каде што се сегашните земјотреси, не може да иницира раздвижување на другите раседи во Македонија оти имал помала сеизмичност отколку раседите кои се поврзуваат со Скопје, Валандово и Пехчево.
Гаревски вели дека сите земјотреси што се случуваат кај нас и во регионот околу нас се резултат на судирањето на африканската и евроазиската плоча, кои, пак, ги раздвижуваат трите помали плочи околу Средоземното Море, односно јадранската, хеленската и анатолиската микроплоча.
„Африканската и евроазиската плоча конвергираат по 4 – 10 милиметри годишно. Како резултат на нивната колизија се раздвижуваат и трие помали микроплочи, јадранската, хеленската и анатолиската. Резултат на ова движење беше земјотресот во Италија од 2016 година со магнитуда од 6,6 степени според Рихтер по кој следуваше рој од земјотреси, афтершокови. Ги имаше стотици во една година. Потоа следуваше земјотресот во Драч од 2019 година со 6,4 степени според Рихтер, па оној во Хрватска од декември минатата година, како и земјотресите кај нас во регионот околу Маврово“, вели директорот Гаревски.
Јавното претпријатие за комунални дејности „Маврово“ во саботата предупреди дека земјотресите ја заматиле водата и дека се препорачува водата да не се користи за пиење.
Серијата земјотреси викендов ги сетија жителите на Маврово, Гостивар, Тетово и Кичево. Повеќето се случија навечер, во време на полициски час кога е забрането движењето, што предизвика дополнителна паника.