Утре, на Велика сабота, Неговото Блаженство, Архиепископот Охридски и Македонски г.г. Стефан, ќе чиноначалствува со светата Василиева литургија во храмот „Свети Наум Охридски“ во Радишани.
-Прославата на Христовото воскресение ‒ победата на животот над смртта, ќе почна во ноќта на 15 наспроти 16 април, со раздавање на светиот Благодатен Оган, по што ќе биде отслужена Пасхална полуноќница. На неа, радосно пеејќи „Воскресението Твое Христе Спасителу, ангелите го воспеваат на небесата, а и нас на земјата удостој нè, со чисто срце да Те славиме”, Архиепископот, свештенослужителите и верниот народ ќе извршат трократен опход околу Соборниот храм, информираат за МИА од МПЦ ‒ ОА.
Во неделата наутро, на денот во кој Црквата го прославува светлото Христово Воскресение, г.г. Стефан ќе отслужи Пасхална Литургија во Соборниот храм „Св. Климент Охридски” во Скопје.