Градоначалничката на Скопје Данела Арсовска ја промовираше политичката партија Нова Алтернатива, чиј претседател отсега ќе биде токму Арсовска. Таа вели дека по три децении, просперитетот во Македонија е само збор употребуван во политичка кампања.
„Исклучително сум горда што не припаѓам на овој корумпиран естаблишмент, а од друга страна припаѓам на оние што знаат како да ги исправат работите. Стојам пред вас со нашата Нова Алтернатива. Политиката не смее да биде извор на раздор и поделби, туку мост за соединување. Политичарите живеат во благосостојба, договорени за спас од криминалот. Сметам дека е доста од ова лицемерие“, рече Арсовска на промовирањето на партијата.
Меѓу гостите од политичките партии дојде и генералниот секретар на СДСМ, Миле Зечевиќ, а присутни се и гости, членови на новата партија. Во првите редови пак, може да се забележат нејзините сопруг и син.