Грчкиот министер за надворешни работи, Никос Коѕијас попладнево во Собранието на Република Македонија се сретна и со лидерот на ДУИ, Али Ахмети.
Коѕијас е во дводневна посета на Македонија, а пред средбата со Ахмети се сретна со министерот за надворешни работи Никола Димитров, премиерот Зоран Заев, како и со претседателот на Собранието, Талат Џафери.
Коѕијас на средбите со Заев и Димитров изрази задоволство од досегашниот напредок во решавање на спорот со името. Конкретно на оваа тема двајцата министри за надворешни работи ќе расправаат на 30 март во Виена каде ќе остварат заедничка средба со медијаторот Метју Нимиц кој од двата нацрт предлози на Грција и Македонија за името треба да направи еден, прифатлив за двете страни.
Според агендата на грчкиот министер по средбата со Али Ахмети, тој ќе се сретне и со лидерот на опозициската ВМРО-ДПМНЕ, Христијан Мицкоски.
Виктор Јованов