Денешен „Фокус“ пишува дека имало тајни политички средби меѓу Груевски и Заев. Откако опозиционерите навестиле дека поседуваат досие со компромитирачки материјали за власта, имало неколку такви средби, затоа што според Неделникот секој сака да извлече максимум во дадената ситуација или да ја сведе штетата на минимум.
„Заев би сакал да ја истргува бомбата за техничка влада, која ќе му овозможи контрола врз изборниот процес, но прашање е зошто Груевски би му го исполнил ова барање кога може лесно да преживее низа скандали со ваква медиумска поставеност. Каква е улогата на Ахмети во целата разврска и зошто се среќавал со Црвенковски“, прашува „Фокус“.
Како што посочуваат Заев побарал исполнување на сите барања за фер изборен натпревар, а Груевски побарал да се разговара без уцени и условувања, по можност понастрана од рефлекторите на јавноста.
Според една од шпекулациите, како што пишува „Фокус“, поттурната и од преставници на ВМРО-ДПМНЕ, доколку евентуално дојде до формирање техничка влада, која би можел да ја предводи вице-премиерот Владимир Пешевски.
Пешевски за ова вели дека се работи за чиста шпекулација.
Весникот прашува дали ќе се објават или ќе се тргува со аферите. Посочуваат дека се уште не се знае кога ќе „оддекне бомбата“.