Ем помилувани за 27 април ем бараат два милиона евра трошоци за адвокатите

Од:

Приближно два милиона евра од државата побарале помилуваните за 27 април, дознава „А1 он“. Станува збор за адвокатските трошоци за судењето, во кои влегуваат трошоци за одржаните рочишта, поднесоците и другите адвокатски услуги, а се на товар на државата бидејќи за обвинетите е запрена кривичната постапка.

Неделно за овој предмет се одржуваа и по неколку рочишта, кои, поради притворите и бројот на обвинетите, траеја до доцна во ноќта. Сумите, како што дознава „А1 он“, се движат од стотина илјади евра од адвокат.

Според Законот за кривичната постапка, кога ќе запре постапката или кога ќе биде донесена пресуда со која обвинетиот се ослободува од обвинението или, пак, со која се одбива обвинението, трошоците на обвинетите и наградата на адвокатите се на товар на буџетот на државата.

Помилувани обвинети преку своите адвокати за настаните од 27 април побарале од претседателката на судечкиот совет, Добрила Кацарска, државата да им ги надомести трошоците за судењето во предметот КОК 40/18.

Судијката од одделението за организиран кримиинал и корупција при Основниот кривичен суд, Добрила Кацарска, која го судеше предметот, за „А1 он“ потврди дека такви барања од адвокатите стигнале, но дека таа трипати досега им го одбивала барањата.

„Ги одбив затоа што сметам дека не им следуваат. Тоа е милост на државата. Не ми паѓа на ум за кривично дело за кое има докази да им ги прифатам барањата. Кривичниот совет со чудни образложенија ми ги враќаше решенијата…“, рече Кацарска за „А1 он“. Неизвесно е каква е одлуката на кривичниот совет, дали останува сумата што била првично побарана или тој износ е понизок.

„А1 он“, според Законот за слободен простап до информациите од јавен карактер, од Кривичниот суд ги побара решенијата за исплата на трошоците за адвокати, за лицата за кои е донесена одбивателна пресуда. Судот ден пред истекот на рокот за одговор достави информација дека одбивателни пресуди во случајот не се донесени и дека се донесени само решенија за запирање на постапката од кривичниот совет. „А1 он“ вторпат испрати ново барање за решенијата за исплата на овие трошоци од кривичниот совет и ги очекува одговорите.

Основицата за ова кривично дело за кое е предвидена затворска казна над 15 години, според адвокатката тарифа, е 18 илјади денари. На тие 18 илјади денари за секое дејство се додаваат 30 отсто на име паушал и 20 отсто на име саатница. Тоа значи дека основицата е 28.080 денари за 1 час. За секој нареден час се плаќа 20 отсто од наградата за предвиденото дејство. Дополнително, во поднесокот во кој има повеќе учесници наградата се зголемува 50 отсто за секое наредно лице, но не повеќе од петпати од предвидената награда.

Помилувани за 27 април беа 15 лица, меѓу кои и пратениците Крсто Мукоски, Сашо Василевски, Љупчо Димовски, Љубен Арнаудов и Јохан Тарчуловски. Амнестија добија и водачите на движењето „За заедничка Македонија“, Богдан Илиевски, алијас Бетмен Велит, режисерот Борис Дамовски, актерот Владо Јовановски…

Од 18 неамнестирани обвинети за организираниот насилен напад во Собранието на 27 април 2017, на вкупно 211 години затвор беа осудени 16. Игор Дурловски доби ослободителна пресуда, а за обвинетиот Сашо Марковски се води одвоена постапка поради болест.

Би можело да ве интересира

Советот на јавни обвинители ги спаси од дисциплинска обвинителите кои не постапија на крававиот четврток

Васко Маглешов

Пресудата за 27 април е на 1056 страници, адвокатите сметаат дека рокот за жалба е прекраток

Татјана Ташкова

ВИДЕО: Ќе се бара екстрадиција за Груевски како организатор на 27 април

Ана Ололовска

Кацарска нема да ги суди организаторите на „27 април“

Ана Ололовска

Куќен притвор за тројца обвинети организатори на крвавиот четврток

Татјана Ташкова

Јанакиески, Вељаноски, Ристовски и Атанасовски обвинети дека го организирале крвавиот четврток

Васко Маглешов