Две сообраќајни незгоди во текот на вчерашниот ден се случиле во тетовски. Повредени се четири лица, а причинета е материјална штета од 200 илјади денари, информираше денеска портпаролот на СВР Тетово Марјан Јосифовски.

Првата незгода се случила вчера околу 9 часот на регионалниот пат Тетово-Јажинце, во близина на „ИГМ Вратница“ при што товарно моторно возило „Форд транзит“ со тетовски регистерски таблици управувано од С.Ш (21) од Теново загубило контрола, удрило во карпа и се превртело.

– Во несреќата возачот С.Ш задобил тешки телесни повреди и по укажаната лекарска помош во тетовската клиничка болница итно е пренесен на скопските клиники. Извршен е увид на местото на несреќата, се расветлува причината и се друго поврзано со истата. Првично, причина е неприлагодена брзина додека материјалната штета се проценува на околу 50 илјади денари рече Јосифовски.

Втората сообраќајна незгода се случила вчера вечерта околу 23 часот на улицата „Илинденска“ во Тетово при што во неа учествувале две, односно три возила, „Шевролет авео“ со тетовски таблици управуван од Н.К (51) од Тетово, „Фиат браво“ што го управувал В.И (20) од Лавце и паркиран „Голф“, сопственост на тетовецот А.А (36).

– Возилото „Фиат“ престигнувајќи удрило во „Шевролетот“ и се превртело додека „Шевролетот“ удрил во „Голфот“. Од удирањето возачите на двете патнички возила и сопатничката во „Шевролетот“ Н.Д (21) од Тетово задобиле телесни повреди и пренесени се во тетовската клиничка болница, а потоа се пуштени на домашно лекување. По извршениот увид се расветлуваат причините за несреќата во која вкупната материјална штета се проценува на околу 150 илјади денари, изјави Јосифовски.