Српската јавност вчера беше потресена од веста за тешката сообраќајна несреќа во која загина Татјана Јечменица (47), позната српска тенисерка.
Сообраќајната несреќа се случила околу 20:54 часот во Србија.
Судирот помеѓу патничкото и товарното возило беше силен, а џипот во кој беше тенисерката е целосно смачкан. Противпожарни екипи од Кошутњак, Железник и Раковица пристигнале на местото на настанот во 21:16 часот и пронашле две лица заробени во возилото.
Пожарникарите успеаја да го извлечат нејзиниот сопруг, но Татјана Јечменица, почина за време на спасувачката акција.
Татјана Јечменица беше истакната личност во светот на српскиот тенис, и како играч и како тренер.
За време на нејзината професионална кариера, Татјана Јечменица играше на сите четири Гренд слем турнири. Нејзиниот најдобар резултат на Гренд слем турнирите беше пласманот до второто коло на Ролан Гарос во 1996 година.
Својот најдобар пласман на светската ВТА листа го постигна во 1996 година, кога беше рангирана на 72-то место во поединечна конкуренција и на 84-то место во двојки.
Откако се пензионираше од теренот, таа остана во спортот.
Во 2005 година, таа стана селектор на тогашната репрезентација на Србија и Црна Гора за Фед Купот, позиција на која работеше една година пред да поднесе оставка.
Подоцна работеше како тренер по тенис и беше сопственик на тениското училиште „Јечменица“ во Нови Сад.
Нејзиниот сопруг беше префрлен во болница во критична состојба. Тој претрпе тешки повреди на градниот кош, а лекарите го ставија во индуцирана кома додека се борат за неговиот живот.