Лабораторијата во МАНУ и лабораторијата на Институтот за судска медицина се ставаат во функција за тестирање односно за обработка на брисевите земени за коронавирусот, со што на дневна база ќе можат да се прават дополнителни 50-100 тестови, изјави министерот за здравство Венко Филипче.
„Таму сега се прави стручен надзор од страна Комисијата за заразни болести и од Министерството за здравство. Со ставање во функција на двете лаборатории практично ќе се елиминира долгото чекање резултати, бидејќи има голем број брисеви во Институтот за јавно здравје“, изјави министерот за здравство.
Досега, голем број граѓани реагираа дека долго време чекаат за да им се закаже термин за тестирање, а дека уште подолго се чекаат резултатите, со оглед на тоа што само лабораторијата во Институтот за јавно здравје ги обработуваше брисевите.
„Тоа што сега се обидуваме со двете лаборатории особено со таа во МАНУ, е практично во еден ден да се добиваат сите резултати од сите болници надвор од Скопје со систем на транспорт. Во таа смисла ќе се транспортираат материјалите на сите пациенти кои што се собрани во текот на претходниот ден и утрото ќе се испратат во лабораторијата за да може во една или најмногу во две тури да се изработат резултатите. Според информациите што ги собравме утрово, а согласно просечниот број што го имаат болниците каде доаѓаат пациентите за дијагноза во Прилеп, Битола итн. сметаме дека овој капацитет од 50 на 100 на ден е доволен“, рече Филипче.
Во моментов се прави рече и реорганизација на лабораторијата во МАНУ, која не е дизајнирана за ваков вид дијагноза, а очекува до среда најдоцна четврток овој систем да биде подготвен, односно чекањето на резултатите да се сведе на 24 часа.