Образовниот систем е трул и не ги подготвува децата да живеат во општество на еднаквост и толеранција, децидни се од Хелсиншкиот комитет за човекови права што денеска го одржува маршот на толеранцијата под мотото Едукација без дискриминација.
„Нашите истражувања покажуваат дека насилството меѓу учениците е големо и постои голема нетолеранција на различностите. Ова се однесува на меѓуетничка толеранција, родови разлики и сексуална определба“, вели Уранија Пировска.
Според нив и натаму доминира размислувањето дека жените имаат улога на домаќинки а мажите треба да имаат поголем авторитет. Исто така големи се навредите врз истополово ориентираните, па така 36 отсто од овие момчиња размислувале за самоубиство.
Од организациите апелираат итно да се коригираат застарените наставни содржини и децата да се учат на толеранција и прифаќање на разликите.