Откако СДСМ објави нова бомба поврзана со владините функционери на ДУИ, важно е да се напомене дека самиот лидер на оваа партија, Али Ахмети, пред неполн месец изјави дека ги смета разговорите за автентични. На 19-ти мај во интервју за албанската телевизија ТВ Клан, Ахмети одговори потврдно на прашањето на новинарот дали смета дека бомбите се веродостојни.
-Да, аудио снимките од бомбите на Заев се автентични – гласеше неговиот одговор.
ДУИ ниту денес не ја демантираше автентичноста на новообјавените разговори, за разлика од ВМРО-ДПМНЕ од каде постојано велат дека разговорите се сечени, лепени и монтирани. ДУИ, од друга страна, во соопштението испратено до медиуми, порача дека обвинувањата на Заев се тенденциозни и побараа аудио снимките да бидат проследени до надлежните органи за да се утврди вината.
– Доколку низ постапка се докаже вина, ДУИ нема да заштити никого, но исто така доколку се докаже дека обвинувањата се засновани на тенденциозни вадење од контекст на приватни разговори помеѓу функционери, истото да се објави, се вели во соопштението од партијата.
Во разговорите што Заев ги објави денеска според СДСМ било дозволено да опстои дивоградба спроти амбасадата на САД на Кале затоа што сопственикот бил близок со партиски функционери, потоа дека агитирале државните тендери да ги добијат фирми блиски до партијата.
М.В