Демократската унија за интеграција го поздравува извештајот за напредокот на Македонија во 2015 година, како многу важен документ во процесот на интеграција, воспоставувањето на демократските вредности и напредокот на земјата.
Од партијата на Ахмети велат дека извештајот е објективен документ, кој ќе служи за спроведување на понатамошни реформи во процесот на европската интеграција.
„Од особена важност за иднината на земјата е подготвеноста на Европската комисија да ја повтори својата препорака за отворање на пристапните преговори со Република Македонија. Оваа препорака подразбира продолжување на имплементацијата на политичкиот договор и значителен напредок во спроведувањето на приоритетните и итни реформи. Исто така, во наредниот период посебно внимание ќе се посвети на подобрување на меѓуетничките односи, вклучувајќи ја и анализа на спроведувањето на Охридскиот договор. Добрососедските односи треба постојано да се промовират, што подразбира и решавање на отворените билатерални прашања, а особено треба да се истакне важноста на решавањето на спорот за името. Апелираме до сите релевантни чинители во земјата целосно да се фокусираат на спроведување на агендата на евро-атлантската интеграција, како единствена алтернатива за мирна, стабилна и просперитетна иднина за доброто на сите граѓани“, се вели во партиското соопштение.