ДОМ јавно ги прашува членовите на Уставниот суд зошто не постапуваат по 4-те пријави за скандалозните ДУП-и во Карпош, поднесени од граѓанската иницијатива Коалиција О2 за чист воздух? Во пријавите за ДУП 3 06, 3 04, 3 05 и С3 19, јасно е наведено прекршувањето на процедурата за донесување, со тоа што не е објавена Одлуката за неспроведување на Стратегиска оцена за влијанието врз животната средина на официјалната страна на општина Карпош.
„Евентуалната реализација на овие спорни ДУП-и би значела натамошно загрозување на животната средина на жителите на општина Карпош, но и на сите Скопјани, имајќи го предвид обемот на население што се планира да се „всели“ во нацртаните градби со гиганстски димензии. Ниеден од овие ДУП-и немаат предвидено 20% зеленило, како што стои во одредбите од Законот за урбано зеленило, донесен во јануари оваа година, како егзистенцијален минимум за нормално и квалитетно живеење! Сите тие планови го прекршуваат Генералниот урбанистички план на Скопје во одредбите за обезбедување еколошки услови за живеење (растојание меѓу објекти, зеленило, проветреност, осончаност, движење на пешаци и моторни возила, инфраструктура и сл.).
Несфатливо е зошто Уставниот суд веќе со месеци ги крие пријавите за ДУП-те во Карпош во фиока, а постапува по нови подоцнежни пријави, спротивно на законската обврска и пракса. Ова не наведува на помисла дека некој, или некои од уставните судии се во директна спрега со заинтересираните инвеститори на овие „гигантски“ објекти. Затоа јавно ги прашуваме дали е ова така како што изгледа од страна, а ако не е, ги повикуваме да ги земат предметите, да ги анализираат и да донесат чесна одлука во интерес на граѓаните на Карпош, а не во интерес на урбанистичкиот мега-бизнис!“, се вели во соопштението на ДОМ.