Директорката на Фондот за здравствено осигурување (ФЗОМ), Маја Парнарџиева – Змејкова денеска го посети Здружението на граѓани НОРА кое се грижи за болните од ревматски заболувања.
На средбата е договорено до ФЗОМ да биде испратена презентација за рана дијагноза на ревматидните заболувања и таа да биде објавена и на веб страницата на Здружението на приватни лекари. Исто така, договорено е дека е неопходно да се изготвуваат протоколи за лекување на ревматоидните заболувања.
Од Здружението се заложиле за можноста од проширување на позитивната листа на лекови на товар на ФЗОМ и предложиле либерализација на пазарот на лекови, што би било во рамки на постоечки буџет за биолошки лекови.
За особен интерес во развојот на ревматологијата, на ФЗОМ му е доделена плакета од Македонската ревматолошка асоцијација.
Од ФЗОМ најавуваат дека и во иднина ќе продолжат со директни средби со здруженијата на граѓани со цел да се утврдат најефикасните модалитети за унапредување на квалитетот на здравствените услуги.