Министерот за надворешни работи на Република Македонија Никола Димитров денеска и утре во Талин, ќе учествува на неформалниот состанок на министрите за надворешни работи на земјите-членки на Европската унија и земјите-кандидати за членство во ЕУ Македонија, Албанија, Црна Гора, Србија и Турција.
Димитров, како што информираат од неговиот кабинет, на состанокото присустува на покана на Високиот претставник на ЕУ за надворешни работи и безбедносна политика Федерика Могерини и министерот за надворешни работи на Република Естонија Свен Миксер, во својство на земја претседавач со Советот на ЕУ.
Дискусиите на состанокот, се вели во соопштението, ќе се фокусираат на спречувањето и борбата против радикализацијата и насилниот екстремизам, како заеднички безбедносни предизвици за земјите членки на ЕУ и земјите кандидати.
На маргините на состанокот, на покана на заменик министерот на Естонија надлежен за ЕУ прашања М. Масикас, министрите на земјите-кандидати ќе учествуваат и на работен ручек на кој ќе се дискутира за политиката на ЕУ за проширувањето и статусот на реформи во земјите кандидати.
