Кандидатот за градоначалник од СДСМ за Куманово, Максим Димитриевски и кандидатите за советници, вечерва одржаа средба со граѓани од Соколана во Куманово и презентираа дел од мерките опфатени во програмата за престојните локални избори. Димитриевски рече дека има бројни проекти наменети за сите граѓани на Куманово и оти е време Македонија да му се одолжи на градот со сериозни капитални проекти.
– И во Соколана и во центарот на градот ќе изградам јавни тоалети, бидеќи ги нема во Куманово. На атлетската патека која е изградена од СДСМ, ќе изградиме современа соблекувална за потребите на спортистите, рече во обраќањето пред присутните Димитриевски. Вети и нови зелени површини, ревизија на договорите за концесија на спортските објекти кои не ги испочитувале обврските, посочувајќи ги стрелиштето, спортската сала, Соколана. Димитриевски додаде дека сега се користат за други намени, наместо како во минатото за спортување.
– Заедно со Владата имам намера тоа да го сменам и може некому лично да му пречи, но овде порачувам ќе се водам првенствено од општите, а не личните интереси на поединци и заедно со вас планирам да го променам ликот на Куманово, рече Димитриевски.
Најави изградба на нови паркиралишта, монтажни и катни гаражи, капитална инфраструктура во коа се опфатени тротоари и велосипедски патеки.