Државната изборна комисија на денешното продолжение на седницата отфрли приговори за пет избирачки места за гласањето во Општина Центар поднесени од страна на ВМРО-ДПМНЕ.
Приговорите главно се однесуваа на нарушување на тајноста на гласањето и агитирање, како и за евидентирање на лични податоци на гласачите од страна на овластените претставници на политичките партии.
Денешната седница започна со еден час задоцнување, а по паузата членовите на Комисијата ќе продолжат со разгледување на останатите 61. приговор од ВМРО-ДПМНЕ за Центар, 17. исто така од ВМРО-ДПМНЕ за Струга. Потоа треба да се разгледаат 252 приговори за гласањето во 15 општини поднесени од СДСМ и коалицијата.
Досега ДИК нема прифатено ниту еден приговор за гласањето во вториот круг. Отфрлени се сите приговори за Куманово поднесени од ВМРО-ДПМНЕ, од НДП, ДУИ и ДПА.
Рокот на Управниот суд за решавање по евентуалните одлуки на ДИК завршува во сабота во 19 часот.