Државната изборна комисија вечерва на седница повторно ги разгледува кандидатските листи на шест политички субјекти кои им беа вратени на доработка поради констатирани неправилности.
Сите партии и коалиции на кои им беа вратени листите, во текот на денов ги доставиле исправките и се очекува да бидат одобрени од ДИК.
Државната изборна комисија на седницата во саботата вечерта ги прифати кандидатските листи на коалицијата „За подобра Македонија“ предводена од ВМРО-ДПМНЕ, на опозициската коалиција предводена од СДСМ, на ДУИ, на ДПА, на ПДП, на ЛП и на Беса.
На доработка беа вратени листите на Коалицијата за промени и правда, Коалицијата ВМРО за Македонија, на Коалицијата „Алијанса за Албанците“, на Левица, на СДПМ и на НДМ.
Овие 13 политички субјекти се пријавија за учество на парламентраните избори на 11 декември и поднесоа кандидатски листи за пратеници до крајниот рок кој истече на 11 ноември на полноќ.
Жребувањето за редоследот на кандидатските листи за изборите треба да се одржи на 20 ноември, а следниот ден почнува предизборната кампања која ќе трае 20 дена.