Ратко Дуев, актуелниот декан на Филозофскиот факултет во Скопје, заедно со уште едно лице се повикани на распит во скопското јавно обвинителство, потврдуваат оттаму за „Макфакс“.
Станува збор за кривичната пријава која во март годинава против Дуев ја поднеле пет професори, негови колеги, за спорниот избор на шеф на Институтот за социологија.
Од Обвинителството за „Макфакс“ велат: „Надлежниот обвинител закажа распит на пријавените лица и на претставник на подносителите на пријавата во насока на проверка на наводите“.
Во март годинава, петмина професори на Инситутот по социологија на Филозофскиот факултет во Скопје реагираа дека во март се одржала „скандалозна“ седница во присуство само на пет професори од вкупно десет и дека со фалсификуван записник бил избран нов раководител на овој Институт. Професорите поднеле и претставка до Управниот инсепкторат.
На седницата тогаш беше избрана професорката Марија Дракулевска Чукалевска за раководителка на Институтот по социологија, иако, според професорите, таа добила поддршка само од петмина нејзини колеги на седница без кворум.
Деканот Дуев по настанот во медиумите изјави дека процедурата за избор била законска, а тој ќе преземел мерки за да се расчисти ситуацијата.
Васко Маглешов
фото: Факултети