СДСМ реагира на, како што велат, однесувањето на министерот за образование Панче Кралев, и на сите останати владини институции и министри, кои се однесуваат како да не живеат во Македонија и како да не гледаат дека незаконски се менуваат имиња на училишта, се тргаат бисти и се промовира беззаконие.
Пред само две недели, рекоа, Кралев и првиот човек на просветниот инспекторат Шехтански изјавуваа дека нема да дозволат промена на имињата на училиштата и дека ако е неопходно, ќе интервенира и полицијата за да се спроведе законот.
„Од ова јуначење и удирање во гради, денеска останаа само бледите најави на министерот за прекршочни пријави и парични казни.
Во меѓувреме, не само што не се вратија таблите со имињата, туку и беа отстранети и бистите на македонските дејци Јане Сандански и Рајко Жинзифов, а сега веќе никој не знае каде се овие бисти и дали некогаш воопшто ќе бидат вратени во училишните дворови.
Сопките што меѓусебно си ги поставуваат ДУИ и ВМРО – ДПМНЕ во борбата за позиции во коалицијата сега се претвораат во крупен проблем на државата, во која двоглавата власт не успева да обезбеди владеење на правото. Законот непречено се крши, а институциите на системот се понижени“, изјави Ана Павловска Данева.
Не може, рече Данева, во недоглед министерството за образование и полиција да си ја префрлуваат одговорноста.
„Владата како колективен орган, мора на јавноста да и соопшти како ќе му застане на пат на ова флагрантното кршење на законот во училиштата во Чаир и како планира да го спречи овој тренд да се прошири и во други општини“, рече Данева.