Драган Данев од ВМРО-ДПМНЕ денеска одржа прес-конференција на која што кажа дека судот подлегнал на притисоците.
– Одлуката да се изрече притвор за три лица кои се предмет на политички прогон од страна на СЈО е срамна и без никаков издржан правен аргумент. Одлуката е политичка, а не правна. Медиумите под контрола на СДС ја најавија уште пред да биде официјално соопштена. Тоа доволно говори околу начинот на кој што работел судот. Со ваквите одлуки се става крај на правната држава и започнува нарачаниот политички прогон, рече Данев.
Според него, ваквата одлука имала за цел да испрати порака дека „или сите ќе клекнете на колена и нема да се борите за државните и национални интереси или ќе завршите во притвор“, „или ќе учествувате и ќе ги поддржите конструираните и политички монтирани обвиненија на СЈО или ќе завршите во притвор“.
– Одлуките кои денеска ги донесе судот се без преседан. Луѓето на кои денеска им беше одреден притвор изминатиот период ниту се обидоа да бегаат, ниту на некаков начин ја опструираа истрагата. Одлуките кои ги донесе судот се чиста политичка одмазда нарачана од СДС, рече Данев.
Како што кажа тој, судиите кои одлучувале можеби мислеле дека Заев во моментов бил семоќен и дека вечно ќе ја имал поддршката да нарачува кој бил следниот што требало да биде на отстрел.
– Сакаме да им порачаме дека ништо не е вечно. ВМРО ДПМНЕ ќе се врати на власт. Незаконското работење и одлучување ќе биде предмет на ревизија. Подолг период предупредувавме и укажувавме дека судот не смее да потклекне на притисоците, да заборави на правните аргументи и да почне да одлучува политички. Дел од судиите го одбраа другиот пат. Оправдување за незаконското постапување нема и нема да има. Секој ќе сноси одговорност за сопствените одлуки, заврши Данев.