Волонтери на Општинскиот Црвен крст денеска поделија уште 13 пакети со храна собрани од донации на граѓани и фирми. Со нив, вкупниот број на поделени пакети е 89 и тие се наменети за социјално загрозени лица или за лица кои останале без работа поради состојбата со корона вирусот.
Секретарот на ООЦК Велес,Орце Николов, ги потсетува граѓаните и фирмите дека може да донираат храна во собирниот пункт во Ученичкиот дом „Лазар Лазаревски“ кој функционира со Општина Велес.
-Ние секојдневно сме на терен и помагаме колку што можеме. Ги повикувам и апелирам до сите граѓани кои се во можност, како и фирмите, да донираат храна и така да ја искажат својата хуманост на дело, повика Николов.
Инаку, првите 54 пакети со храна беа доделени од градинката „Димче Мирчев“.
Од Општинскиот Црвен крст Велес соопштуваат и дека покрај храна, може да се донираат и пари наменети за социјално загрозени семејства и без приходи како последица на пандемијата.