Триесетина членови на Обединети за Македонија објавија дека преминаа во ВМРО-ДПМНЕ, а причината за тоа како што изнесоа на прес конференцијата е што не прифаќаат коалицирање со Бранко Црвенковски и Љубчо Георгиевски.
На пресот говореше Наталија Ивчева за која од ОМ велат дека е разрешена од претседателството на ОМ пред два месеци.
Според Ивчева партијата ОМ се гасне и не постои повеќе, иако призна дека печатот на партијата е кај актуелното претседателство.
ОМ: Партијата ја основа Љубе Бошкоски, никој не може да ја згасне
Од Обединети за Македонија преминувањето и гаснењето на партијата го нарекоа смешна театарска претстава. Тие посочија дека огромен број од членството останува зад лидерот Љубе Бошкоски а денешното преминување според нив е само профит и добра зделка на маргинални членови на партијата и луѓе кои се разрешени од функциите.
Според нив, голем дел од општинските раководства што денеска преминуваат се сменети уште во март, а печатите на општинските на ОМ ги задржале бесправно, за што партијата ги објавила како неважечки.