Владе Богдановски, член на Судскиот совет, денеска побара да се расправа за начинот на кој се разговарало за работата на Советот во дебатни ТВ-емисии.
„Јас не сум ни криминалец ни џелат на судството. Барам да се разговара за тоа како сме нарекувани во телевизиските емисии. Посебно реагирам за тоа како еден т.н. адвокат ме нарече во една емисија“, рече Богдановски.
Советот како точка на дневен ред ја постави и темата дека, како што нагласија и членовите, за неговата работа се информира необјективно.
Судскиот совет на денешната седница ќе расправа, меѓу другото, за поведување постапка за утврдување одговорност за судија. На седницата треба да бидат определени подносители за барањата за утврдување нестручно и несовесно вршење на судиската функција од Советот за утврдување факти и поведување постапка за утврдување одговорност за судија.
В. Маглешов