Се намалува веројатноста дека Британецот што почина во Скопје имал ебола особено по добиените епидемиолошки податоци од неговата земја според кои изминативе неколку месеци не престојувал, ниту се движел во која било држава каде што ја има оваа болест.
Како што соопшти денеска д-р Јованка Костовска, раководител на Секторот за превентивна здравствена заштита во Министерството за здравство, материјалот од починатиот пациент е веќе пристигнат во референтната лабораторија во Хамбург, а резултатите се очекуваат доцна попладнево.
– Се до добивање финална потврда од лабораторијата во Хамбург, продолжуваме да постапуваме согласно медицнските протоколи, нагласи Костовска.
Во Македонија засега нема друг сомнителен случај на ебола. Лицата кои моментно се во карантин во хотелот во ТЦ „Мавровка“, се во добра општа здравствена состојба и не покажуваат никакви симптоми.
– Иако денеска веројатноста дека станува збор за ебола е уште помала, се надеваме на најдоброто. Сепак, како здравствен систем сме подготвени и за справување со најлошото сценарио, потенцира Костовска.