Затвореник бил пронајден мртов во казнено-поправната установа во Струга каде што ја издржувал својата казна, потврди Секторот за внатрешни работи од Охрид.
Телото на 36-годишниот битолчанец доцна синоќа го забележал еден од затворениците во оваа установа, по што веднаш ја алармирал чуварската служба. Лекарската екипа која дошла само ја констатирала смртта.
Според првичните информации, нема траги на насилство врз починатиот затвореник, но точните причини за неговата смрт ќе бидат соопштени по обдукцијата врз телото што треба да биде изведена во текот на денешниот ден.
Казнено-поправниот дом Струга е установа од отворен вид во која казната затвор ја издржуваат машки лица осудени со правосилна пресуда за кривични дела за небрежност на казна затвор од три до 5 години или ако по пресметаниот притвор им преостанува од три до пет години од изречената казна.
Освен лица кои се осудени за кривични дела од небрежност, казната затвор ја издржуваат и машки лица кои се осудени на казна затвор до 3 години односно кога остатокот од казната по пресметаниот притвор изнесува до 3 години, како и машки лица повторници осудени со правосилна пресуда на казна затвор до 6 месеци односно кога остатокот од казната по пресметаниот притвор изнесува до 6 месеци, што значи дека функционира и како установа од полуотворен вид.