Опозициската ВМРО-ДПМНЕ во Македонскиот народен театар го слави празникот 23 Октомври – Денот на македонската борба. На прославата присутни се голем број од функционерите од партијата, но ги нема исклучените членови, ниту почесниот претседател Никола Груевски.
Лидерот на партијата Христијан Мицкоски беше пречекан со овааци и химната на партијата, а тој ќе има и свое обраќање на прославата.
Во Македонскиот народен театар, покрај Мицкоски може да се забележи и генералниот секретар на партијата, Игор Јанушев, како и потпретседателот Алексадар Николоски. Меѓу првите кои пристигнаа беше и поранешниот министер за правда Михајло Маневски, а тука се и Влатко Ѓорчев, Трајко Славески, Владимир Пешевски, Коце Трајановски, Тони Михајловски, Антонио Милошоски, како и Мане Јаковлески, еден од основачите на партијата.
Прославата доаѓа само еден ден по седницата на Централниот комитет на ВМРО-ДПМНЕ, на кои разрешени од партиските функции беа градоначалникот на Кавадарци, Митко Јанчев и членот на Извршниот комитет Костадин Богданов, а исклучување од партијата беше побарано за Сашо Мијалков и Никола Тодоров.
Претходно од партијата беа исклучени и пратениците кои гласаа „За“ уставните измени во Собранието.
Ниту еден од исклучените и разрешените членови не се присутни на прославата, а помеѓу присутните не може да се забележни ни поранешниот премиер Никола Груевски.
Маја Илиевска-Пачемска