Сите корисници на старосна, семејна и инвалидска пензија во износ до 10.870 денари од 1 јануари имаат право на бесплатно болничко лекување, информира директорот на Фондот за здравствено осигурување Јован Грповски на денешната средба со Сојузот на здруженија на пензионери на Македонија.
Ова право, како што истакна, ќе можат да го користат околу 120.000 пензионери што земаат потпросечна пензија, а партиципацијата за нивното болничко лекување ќе ја покрива Министерството за здравство. За таа намена од Буџетот на Република Македонија се одвоени 37 милиони денари.
– Одлуката е веќе објавена во „Службен весник“ и стапена е во сила, а Министерството за здравство ги информира сите јавни здравствени установи и приватните кои имаат склучено договор со Фондот за лимитот од 10.870 денари до кој важи услугата, изјави Грповски.
Претседателот на Сојузот на здруженија на пензионери Драги Аргировски рече дека пензионерите се презадоволни од новата мерка на Владата со која покрај бесплатното користење на јавниот градски превоз и можноста за бесплатна бањска рекреација им се овозможува бесплатно болничко лекување.
– Како здружение баравме од Владата да одобри бесплатно здравство за сите пензионери со над 65 години старост, но сметаме дека оваа мерка е многу подобра од бараната. Со оваа мерка се опфатени 120.000 пензионери, а доколку се усвоеше нашето барање бенефит ќе имаа само околу 30.000 пензионери, рече Аргировски.