Трајни решенија за водоснабдувањето на општината и околните места, најави Невзат Бејта, кандидатот за градоначаланик на Гостивар од редовите на ДУИ, по остварените средби со граѓаните на населбите во јужниот дел на општината. Тој најави и некои проекти кои се предвидени во предизборната програма со наслов „За утрешен Гостивар“.
– Во населбата Фазанерија, со реализација на проектот „Вода за Гостивар”, дефинитивно ќе се оконча проблемот со недостиг на вода за пиење. Пред два дена, Министерството за транспорт и врски распиша тендер за изведување на работи за замена на главниот цевковод од Вруток па се до Гостивар. Изградбата на првиот резервоар за акумулација на вода е при крај и се наоѓа во близина на селата Вруток и Равен. Останатите три резервоари ќе се изградат во Здуње, Бањица и Чегране, рече кандидатот за градоначалник Бејта по посетата на овие населби.
Од проектите за населбата Циглана, предвидено е изградба на детско игралиште во близина на подрачното училиште „Единство” и нова водоводна линија со пречник од 300 мм од Горна Бањица до населба Циглана.
За населбата Бањешница предвидена е реконструкција на каналот за наводнување Бањица – Бањешница – Мало Турчане, замена на постоечката водоводна линија со нова со поголем пречник, изградба на детско игралиште во близина на спортскиот терен кај мостот и проширување на улицата покрај реката Вардар од мостот на улица „Беличица“ до мостот кај основниот суд.
