Министерот за надворешни работи Никола Димитров денеска го прими во проштална средба aмбасадорот на САД во Република Северна Македонија, Џес Бејли на која изразувајќи задоволството од неговиот плоден ангажман му врачи благодарница за посветеноста и напорите вложени во промовирањето на американско-македонското пријателство и блиска соработка.
Како што соопшти МНР, министерот Димитров ја нагласи важната улога, поддршка и верба на САД во постигнувањето долгорочна стабилност, демократизација и просперитет на нашата држава. Во оваа насока, се додава, шефот на димпломатијата ја истакна благодарноста за континуираната поддршка од САД на евро-атлантскиот пат на Република Северна Македонија.
Амбасадорот Бејли, пак, се посочува, го истакна своето задоволство што по четири години, заминува од земја која направи историски исчекор и која го добива своето заслужено место во НАТО, и цврсто чекори кон ЕУ. Изрази уверување дека со влезот на Северна Македонија во НАТО, ќе се иполни визијата на САД за мирен, стабилен и попросперитетен регион, стои во соопштението.