Апелациониот суд Скопје извести дека од затворот во Шутка излегуваат обвинетите во предметот „Титаник“, Миле Јанакиески и Кирил Божиновски, заедно со сите останати осомничени во предметот на СЈО „Империја“.
„По повлекување на предлогот за одржување јавна седница од страна на обвинетите, на нејавна седница на ден 28.12.2018 година, кривичниот совет на Апелациониот суд Скопје донесе одлуки со кои се укинува мерката притвор против обвинетите Н. Ј., К.Б., З.А. и М.Ј.“
Тоа значи дека притвор излегуваат сите осомничени за „Империја“ или поточно соработникот на Орце Камчев, Ненад Јосифовиќ, директорот на „Ексико“, Тодор Мирчевски и Зорица Арсовска, сметководителката во фирмите на Камчев.
Од предметите на СЈО, во Шутка засега останува само ексшефот на УБК, Сашо Мијалков, но се очекува деновиве и за него да има одлука за куќен притвор од кривичниот совет на скопска единица.
Васко Маглешов