Кривичниот совет на Апелациониот суд Скопје ја уважи жалбата на СЈО за предметот познат како „Триста“ и аудио записи од телефонски разговори ќе може да бидат користени како докази во предметната кривична постапка.
Со ова се преиначува одлуката на Основниот суд Скопје 1 со која телефонските разговори беа издвоени од списите на предметот како доказ прибавен на незаконит начин.
Случајот „Триста“ беше презентиран од СЈО на прес-конференција на 23 март. Специјалната обвинителка Фатиме Фетаи кажа дека се работи за кривично дело – злоупотреба на службената положба и овластување, а постои основано сомнение дека е извршено од страна на помошник министер во Министерството за внатрешни работи, во врска со јавна набавка што се однесува за 300 возила.