Кандидатите за градоначалници на Аеродром и на Битола од Коалицијата „За подобра Македонија“ предводена од ВМРО-ДПМНЕ, Ивица Коневски и Владимир Талески, убедливо водат пред своите опоненети од Коалицијата „Сојуз за иднината“ на чело со СДСМ, покажува анкетата на Македонски центар за меѓународна соработка и Институтот за демократија Социетас Цивилис-Скопје направена меѓу 8. и 11. март, на примерок од околу 800 испитаници.
Според анкетата, за кандидатот на ВМРО-ДПМНЕ Ивица Коневски се изјасниле дека ќе гласаат 58,1 отсто од испитаниците, а за кандидатот на СДСМ Диме Велковски 10,1 отсто. Во однос на советничката листа, за таа на ВМРО-ДПМНЕ поддршка дале 44,2, а на СДСМ 13,3 проценти од анкетираните. Одѕивот на гласачите во Аеродром, според анкетата ќе биде 66 проценти.
Во Битола за Владимир Талески кој е кандидат на ВМРО-ДПМНЕ се изјасниле дека ќе гласаат 40,1 отсто, а за Менде Диневски од СДСМ 14,7 отсто. За советнички листи на ВМРО-ДПМНЕ се изјасниле 32,3, а за таа на СДСМ 16,1 отсто. Одѕивот ќе биде 68,5 проценти.
Кандидатот на СДСМ Аце Коцевски, пак, со 33,4 проценти, е во благо водство пред кандидатот на ВМРО-ДПМНЕ Славчо Чадиев за кој се определиле 31,3 проценти од испитаниците. Кај советничките листи, за ВМРО-ДПМНЕ рекле дека ќе гласаат 32,6 отсто, а за СДСМ 15,3 проценти анкетирани. Се проценува дека одѕивот во Велес ќе биде 68,6 отсто.
