Здружението за заштита на животните, Анима Мунди, организира протест денеска во 16 часот пред циркусот Балкански, како знак на револт против измачувањето на животните во име на нечија заработка и забава.
„Факт е дека животните природно не возат велосипед, не стојат на глава, не балансираат на топки, ниту пак скокаат низ огнени прстени. Како би ги присилиле да ги изведуваат тие збунувачки, физички и неудобни трикови, тренерите користат јажиња, цврсти околувратници, струјни удари, стапови со куки на врвот и останати болни предмети. Исто така, и самото чување и превезување на животните од циркус е патење и малтретирање“, посочува здружението.
На Фејсбук настанот за денешниот протест, креиран од Анима, пишува:
„Тепани, изгладнувани, измачувани, осамени, болни, исплашени, цел живот РОБОВИ, за да те насмеат! ОСУДИ го изживувањето и искористувањето на послабите! Биди глас на оние кои страдаат во тишина! Кажи што мислиш во однос на суровата „уметност“! Кажи што мислиш за крваво заработените пари! Кажи да за уменост – но КАЖИ НЕ ЗА ЦИРКУСИТЕ СО ЖИВОТНИ!“
Здружението бара законска забрана за изведување на циркуси кои вклучуваат точки со животни, а и потсетуваат дека во Хрватска, Србја, Босна и Херцеговина, Словенија, исто така и во повеќето ЕУ земји, циркусите со животни се законски забранети.
Протестот е зад СЦ „Борис Трајковски“.
Јасна Атанасова