Познатиот албански кардиохирург, со дебарско потекло, д-р Петрит Бара денеска беше прогласен за почесен граѓанин на Дебар.
На свеченост во локалната самоуправа градоначалникот Аргетим Фида, му го врачи признанието на д-р Бара, актуелен Декан на Медицинскиот факултет при Тиранскиот универзитет.
– Признанието му се доделува за неговите големи постигнувања во областа на медицината и максималната подршка за отворање на студии по медицина на ДУТ и дисперзираните студии за физиотерапевти од ДУТ во Дебар, рече градоначалникот Фида.
Д-р Бара рече дека има посебно чувство на задоволство од даденото признание од страна на Дебар.
– Медиицнскиот факултет при Универзитетот во Тирана, секогаш ќе биде отворен за специјализација и натамошно научно унапредување за албанските кадри. Ова признание кое го добивам денеска е уште една обврска повеќе за поголемо ангажирање во областа на медицината, рече Бара.
Досега за почесни граѓани на Дебар се прогласени Сине Холан од норвешката невладина организација „Норвак“, Ферит Дибра – познат албански биолог по потекло од Дебар, Николас Кнауф, сопственик на германската компанија „Кнауф“ и Бамир Топи, поранешен претседател на Албанија.
