Лидерот на Демократската унија за интеграции Али Ахмети денеска ја почнува официјалната посета во Брисел во пресрет на објавувањето на Извештајот за напредокот на Македонија од ЕУ, на 16 октомври и декмврискиот Самит на Унијата.
Средбите на Ахмети во Брисел, и планираните посети на Париз и Хаг, како што најави ДУИ, е продолжение на комбинираните домашните и меѓународните напори за поттикнување на интегративниот процес на Македонија во НАТО и ЕУ.
По повод средбата во Брисел, Ахмети во Центарот за студии на европските политики ќе организира тркалезна маса за перспективите на Македонија. Ќе се сретне и со европскиот комесар за проширување Штефан Филе, директорот за Европа и Азија во надворешната служба на ЕУ, Луиз Филипе Фернандез Де Ла Пења, политичките советници на претседателот на Советот на ЕУ, Ван Ромпуј, европратениците Едуард Кукан и Ричард Ховит, кој воедно е и известувач за Македонија во Европскиот парламент.
Ахмети од Хаг заминува за Париз. Во Елисејската палата и ќе се сретне со Фабиен Пеноне, советникот за Балканот при што ќе побара поактивен ангажман на Франција и претседателот Франсо Оланд за решавање на прашањето за името.
Лидетрот на ДУИ ќе ја посети и Холандија, каде што ќе се сретне со министерот за надворешни работи Франс Тимераман, а ќе има и повеќе други средби.
По Париз и Хаг, Ахмети ќе се врати повторно во Брисел, на средба со заменик генералниот секретар на НАТО, Александар Вершбау, со кого ќе разговара за членството на Македонија во НАТО и потребата за поголем меѓународен ангажман.
Ахмети ќе се сретне и со новоименуваниот генерален директор за проширување Кристијан Даниелсон, кој ќе организира работен ручек за некои постојани претставници на земји-членки на Европската унија во Брисел.
Ахмети ќе биде придружуван од вицепремиерот за европски прашања Фатмир Бесими и шефот на неговиот Кабинет, Артан Груби.