Лидерот на Демократската унија за интеграција, Али Ахмети, и новиот холандски амбасадор во Македонија, Ваутер Пломп, на денешната средба разговарале за политичките случувања и имплементацијата на договорот од 2 јуни, предвремените парламентарни избори, како и интеграцијата на Македонија во НАТО и во ЕУ.
Ахмети, како што соопшти ДУИ, зборувал за предизвиците кои се испитуваат во работните групи за спроведување на обврските што произлегуваат од договорот од Пржино и ги соопштил позициите на ДУИ.
– Што се однесува на активната регистрација на гласачите, овој поттик е спротивен на духот на гарантирање на правото на глас за секој граѓанин, додека ДУИ се ангажира за транспарентно административно расчистување на листата на гласачите со проверки на терен, стои во соопштението од ДУИ.
Партијата, рекол Ахмети, ја поддржува имплементацијата на договорот како целина и нејзиниот заклучок што е можно поскоро така што, како што се наведува, на земјата да и се врати политичката стабилност и да се фокусираме на Евроатланската интеграција и решавањето на спорот со името.
Ахмети искажал надеж дека тимот на специјалниот обвинител ќе работи чесно и со прецизност додека ДУИ ќе го поддржи процесот целосно.
Соговорниците разговарале за меѓуетничките односи како столб на стабилноста на земјата. Ахмети се заблагодарил за поддршката што холандската влада ја дава на имплементацијата на Охридскиот договор.